餐牌提供8款精選套餐 如果有特別喜好嘅部位亦可以自由搭配 份量由50-300g不等 而我就點咗餐廳特別推薦嘅NO.1之選 《LIKE套餐》250g :有牛舌、胸腹肉、橫膈膜肉 包括白飯、和風湯、泡菜/迷你沙律 (白飯份量:可選150g/200g/300g) 感覺點餐後唔使3分鐘,食物就已經迅速送到我面前,非常有效率!
~ 牛舌:每塊厚薄均勻,屬我喜歡嘅質感。顏色鮮紅,望落都已經知道肉質新鮮,令我垂涎三尺。薄薄一塊,好快已經可以燒熟,我就鍾意將牛舌燒到有少少脆邊,令咬落口感更為香口脆薄,油脂喺口腔內慢慢散發出嚟,令我食慾大增 ~ 橫膈膜肉:肉質鮮嫩,每塊肉切得比較厚身,咬落絕對係啖啖肉,口感非常豐富。由於每塊肉嘅脂肪分布比例平均、恰到好處,一口咬落,就感覺到橫膈膜肉非常腍軟,油脂香味立刻喺口腔爆發出嚟,令我更加想配多幾啖白飯一同進食。 如果你係屬於「食肉獸」類朋友,橫膈膜肉絕對係一個唔能夠錯過嘅選擇,個人私心推介
~ 胸腹肉:特點係肉質油脂部位會較多,但係由於切得比較薄身,當燒熟之後,油脂部份收緊,即使咬落,都唔會有油膩感覺,相反仲帶出多一份肉嘅油香,係另一種滋味。我就比較喜歡將胸腹肉燒到有少少脆口,令口感香脆肉滑,咬落滿口油香,真係白飯都食多幾啖,胸腹肉絕對係呢一餐嘅驚喜! 如果你係屬「重口味」朋友,相信你都會愛上。 ~ 食燒肉,除咗講求肉質新鮮之外,其實所配搭嘅白飯就係整體用餐嘅靈魂所在。白飯質量,絕對影響整個用餐體驗。餐廳用嘅係獲評最高級別的「特A」米,所以望落晶瑩剔透,黏黏嘅口感,食落特別香軟,配以剛燒好嘅肉一齊進食,口感更為豐富。對於我呢類「無飯不歡」嘅人嚟講,絕對令我有一種要繼續追住落去食嘅感覺。 迷你沙律,新鮮開胃。和風湯,味道比較濃厚,夠晒醒胃。 ~ 配備8款自選調味料: 黑胡椒、海鹽、原味BBQ醬、蒜香醬油、鹽味醬、辣味噌醬及韓式辣醬,香港店更特別加入港人最愛❤嘅胡麻醬 另外,由於餐廳引入進口無煙烤爐,配有先進除煙技術,即使我用膳完畢,離開餐廳,身上都唔會有大陣油煙味,抵讚!
今次「一人燒肉」整體用餐經驗非常滿意,仲好有驚喜 - 價錢親民 - 食物質素有保證 - CP值超高 就算一個人 都可以隨時隨地輕鬆享受食燒肉樂趣 簡直係一眾「食肉獸」嘅喜訊 【Yakiniku Like 燒肉Like】依家仲有 開幕驚喜「29」優惠送俾大家 ➡於正式開幕日及翌日 (2021年1 月14日及1月15日) 推出限時超值燒肉套餐優惠 顧客只需以港幣$29 (日文的「肉」字發音與「29」相近) 即可享用人氣「胸腹肉套餐」200g (原價:港幣$72) (每日名額:100個,售完即止!) 每月優惠 ➡逢29號 = 日本肉の日 每個月都會送出不同驚喜食品 燒肉Like 香港 地址: 新界沙田新城市廣場, 四樓 408 號舖 #YAKINIKULIKE #一人燒肉
IG@yakinikulikehk
沒有留言:
張貼留言